எண்ணலங்கார லகரி

 பாடல் - எண்ணலங்கார லகரி

பண் - இந்தளம்
தேவாரப்பண் - ஒன்றுகெலாம் அவர்
இராகம் - நாதநாமகிரியா

ஒன்றா மவ ரோதிய தாதிமுகம்
ஒன்றா மவர் சூர னுடம்பெறிவேல்
ஒன்றா மவ ருன்னத ஞானகதி
ஒன்றா மவ ருண்மை வியாபகமே. ..  1

இரண்டா மவ ராடெழி லேறுகழல்
இரண்டா மவ ரேசறு தேவிவகை
இரண்டா மவ ரேறிள மஞ்ஞை விழி
இரண்டா மவ ரேர்க்கொடி வீயடியே.  ..  2

மூன்றா மவர் சொல்லிய மூத்ததமிழ்
மூன்றா மவர் தம்முக மொன்றுவிழி
மூன்றா மவர் முத்திகொ ளான்மவகை
மூன்றா மவர் மொய்ம்புர மின்னூலே. ..  3

நான்கா மவர் நல்கிய நாதமறை
நான்கா மவ ராகம நற்பிரிவு
நான்கா மவ ரூரு நறுந்தகர்க்கால்
நான்கா மவர் நட்பி னருள்வரமே. ..  4

ஐந்தா மவ ராற்று மருங்கருமம்
ஐந்தா மவ ராணைசெய் பாசவகை
ஐந்தா மவ ராறற வோர்க்குணர்த்தல்
ஐந்தா மவ ரால்விரி பூதமரோ.  ..  5

ஆறா மவ ரானன மென்றறைதல்
ஆறா மவ ருண்ட முகைச்சியரெண்
ஆறா மவர் முக்கிய மான தலம்
ஆறா மவர் மந்திர வக்கரமே.  ..  6

ஏழா மவ ரெண்ண மிழைத்தகடல்
ஏழா மவர் சிட்டியி லேதோற்றம்
ஏழா மவ ரேர்க்கொடி யானவனா
ஏழா மவ ரின்னிசை யின்சுரமே. ..  7

எட்டா மவ ரூழியப் பாலாரினம்
எட்டா மவர் குட்டு மிருஞ்சிரன்கண்
எட்டா மவ ரின்சிவ யோகாங்கம்
எட்டா மவ ரீறி னெடுங்குணமே. ..  8

ஒன்பா னவ ரைத்தொழு துய்வீரர்
ஒன்பா னவ ருத்திசொல் காதைரசம்
ஒன்பா னவர் நூபுர முற்றமணி
ஒன்பா னவ ராணை யுலாங்கோளே.  ..  9

பத்தா மவ ரைச்சிந்தை பண்ணுதிசை
பத்தா மவ ருக்கிதிற் பாடுகவி
பத்தா படி யாயென் றவர்சொனசம்
பத்தார் புகழ்ப் பாவலர் தேவவரே. ..  10